INFLUENSIA PERSONALIDADE BA DEZEMPENHU FUNSIONARIU (I)

 KAPĺTULU I

PRELEMINÁRIU

1.1. Antesidencia

1.1.Antesedente

Ho mundansa teknologia no globalizasaun kompetisaun iha seitor hotu aas tebes inklui seitor rekursu umanu ba teknologia no globalizasaun no rekursu umanu global hanesan rekursu umanu ne’ebe laiha limitasaun geografikamente ka kapasidade rekursu humanu ne’ebe bele sevisu iha nasaun ka teritoria ida ne’ebe deit inklui regional sira tuir nia kapasidade personal no nesesidade organizasaun ka instituisaun ida nian. Iha mundu negosiu ka servisu kompetisaun sei lao makaas liutan no nesesidade ka demanda mundo sei sae nafatin hodi halo tranformasaun ba rekursu umanu. Taylor (1994) hateten katak asaun ne’ebe organizasaun ka instituisaun ida halo iha transformasaun atu hasoru problema sira iha futuru mak hanesan: a). strectch goals ne’ebe ejiji katak tarjetu tenki spesifiku no bele sukat, b). Visaun futuru, c). Strutura ne’ebe simples, d). Kultura foun ne’ebe liga ba profesionalismu, e). Orentasaun ba kualidade ka servisu klase mundial, f). Prestasaun jestor, iha kriteria kada funsionariu sei fo produsaun ne’ebe iha kualidade no servisu ne’ebe bele halo satisfasaun, g) Inovasaun, h). Parseiru no redi servisu. Husi ida ne’e hateten katak rekursu umanu hanesan mos determinasaun ba transformasaun globalizasaun liu husi influensa personalidade no kompetensia ba desempenhu funsionariu iha instiituisaun ou organisasaun ida nia laran.

Rekursu umanu nasional hanesan kapasidade no kualidade rekursu umanu ne’ebe iha nasaun ida nia laran liga ba servisu sira ne’ebe instituisaun no organisasaun nasional sira oferese. Rekursu umanu nasional kada nasaun sempre iha kapasidade, kualidade no kuantidade nebe diferensia hare liu husi nesesidade servisu nian. Iha nasaun kiik sira rekursu umanu dala barak sai obtaklu boot ba desenvolvimentu nasaun ida nian. Ita bele hateten katak nasaun ida ne’ebe iha rekursu naturais ne’ebe diak, maibe laiha rekursu umanu ne’ebe sufisiente sei kontinua fo impaktu ba desenvolvimentu nasaun ida ne’e nian katak rekursu umanu mos mak sai influensa ba determenisaun nasional.

Rekursu umanu hanesan fator ida ne’ebe importante tebes ne’ebe labele hasees husi organisasaun ou instituisaun. Rekursu umanu mos hanesan xavi ne’ebe dezenvolve instituisaun ou organisasaun, tuir nia prinsipiu rekursu umanu hanesan personal ou ema sira ne’ebe servisu ou halao knar, responsabilidade, sai kakutak no halo planeamentu atu atinji ba objetivu organisasaun ou instituisaun nian. Kolia kona ba rekursu umanu sei lasees mos husi funsionariu hanesan ema hotu ne’ebe fo nia servisu ba instituisaun ou organisasaun ka organisasaun ou instituisaun ne’ebe presija funsonariu atu halao organisasaun nia servisu ne’ebe funsionariu sira sei simu husi organisasaun salariu no kompensasaun sira liga ba funsionariu ida-idak nia kompentensia.

Iha rekursu umanu parte ne’ebe ita presija hare klean liu mak influensa personalidade no kompetensia ba desempenho funsiorariu, iha parte ida ne’e ita mos sei hare autor influensa sira ne’e iha organziasaun ou instituisaun nia ne’ebe fo impaktu tebes ba desempenho funsionariu nian. Atu iha desempenhu ne’ebe diak husi funsionariu sira ita mos sei liga ba komitmentu kada organisasaun ou intituisaun oinsa sira nia kontribuisaun ba desempenhu sira ne’e, tamba iha kada instituisaun ou organisasaun sempre iha diferensia personalidade sira ne’ebe halao knar no responsabilidade no oinsa instituisaun ou organisasaun mos bele jere diferensia sira ne’e hodi atinji objetivu ne’ebe organisasaun ou instituisaun sira iha.

Funsionariu hanesan personal ka hanesan individu sira ne’ebe halo asaun ka servisu ba sira nia an liga ba sira nia prova kompotensia, tamba ema mak jere ka jestor ba rekursu hotu ne’ebe organisasaun ka instituisaun iha, sei laiha valor bainhira organisasaun ou instituisaun iha rekursu ne’ebe barak no diak, maibe ema ka personal sira ne’ebe iha laran laiha kualidade ne’ebe diak atu halo jestaun ou jere rekursu sira ne’e.

Funsionariu ida sei lasees husi kompetensia ne’ebe hanesan area espertu ne’ebe nia iha hodi halao nia servisu ka knar iha area espesifiku, tuir knar no responsabilidade ne’ebe nian iha. Kompetensia ne’ebe funsionariu ida iha mos liga ba nia konesimentu, kapasidade atu halao knar no reponsabilidade ne’ebe fo resultadu diak ba organisasaun ka instituisaun ne’e nia servisu ba hodi kontibui ba nia desempenhu inklui mos nia organisasaun ou intituisaun ne’ebe nia servisu. Kompetensia ba funsionariu ida bele sukat baseia ba nia esperensia konesimentu, abilidade no atetude.

Desempenhu funsionariu hanesan fator ne’ebe fo influensa boot no importante ba instituisaun ou organisasaun, tamba susesu kada organisasaun ou instituisaun konforme oinsa desempenhu funsionariu nian halao knar no responsabilidade tuir resultadu servisu periodu ne’ebe iha. Desempenhu funsionariu hanesan resultadu servisu ne’ebe diak husi aspeitu kualidade no mos kuantidade ne’ebe bele atinji husi funsioanriu ida bainhira halao nia servisu tuir responsabilidade ne’ebe nia hetan. Hodi nune’e bele hatene katak desempenhu funsionariu sempre liga mos ba problema desenvolvimentu abilidade personal no servisu funsionariu nian atu atinji ba objetivu organisasaun ou intituisaun.

Dezenvolvimentu desempenhu funsionariu sei mosu baseia fator hanesan personalidade ne’ebe diak ne’ebe funsionariu sira iha no iha kompetensia ne’ebe aas. Personalidade hanesan karateristika sira ema ka individu ida iha ne’ebe bele observa husi nia hahalok ka atetude, nia hanoin ka idea no nia sentimentu atu nune’e funsionariu ne’ebe iha personalidade diak bele hasae desempenhu no relasaun sosisal ho ema ka individu seluk, enkuantu atu hatudu resultadu servisu ne’ebe diak husi funsionariu tenki iha konesimentu, abilidade no atetude servisu diak. Iha parte seluk mak personalidade funsionariu iha influensa ba desempenhu funsionariu no reputasaun instituisaun ou organisasaun hasoru publiku, ida ne’e hanesan razaun bainhira nain ka jestor halo esforsu hasae desempenhu funsionariu liu husi komprensaun oinsa kondisaun ka tipu personalidade sira nia funsionariu nian.

Ho pesonalidade kada funsionariu iha organisasaun ou instituisaun ho sira nia karateristika ne’ebe diferensia no uniku bele fo influensa ba iha fatin servisu. Karateristika personal funsionariu bele forma mos liu husi prosesu nia aprende iha nia moris nune’e bele forma personalidade individual. Ho diferensia karaterisktika kada funsionariu sira ne’e espekta katak lideransa ida bele hatene no komprende personalidade kada funsionariu atu nune’e aloka tuir servisu atu atinji ba desempenhu ne’ebe diak.

Robbins no Judge (2008) esplika katak personalidade bele hateten hanesan meius hotu ne’ebe halo husi ema ka individu halo reasaun no interasaun ho individu seluk. Iha prespetiva barak kona ba tioria personalidade individual ne’ebe iha nia konseitu iha ida ne’ebe hanesan The Big Five Personality Theory ka teoria boot lima personalidade husi McCrae no Costa. Teoria ida ne’e komprensivu no popular iha jestor sira no peskizador sira atu sukat no determina personalidade individu ida nian. iha teoria ne’e nia laran halo kategoria ba dimensaun lima boot personalidade mak openness to experience (nakloke ba buat foun), conscientiousness (kuidadu), extriversion (ekstroversaun), agreeableness (simpatia), no Neurotisme (Neurotismu).

Konesimentu no abilidade hanesan kompetensia ida. Kompetensia ne’ebe funsionariu ida iha hodi hasae nia desempenhu ne’ebe diak iha termus nia servisu no organisasaun ou instituisaun. Tamba, funsionariu ne’ebe iha kompetensia aas iha posibildiade lalais no fasil liu kompleta nia servisu.