MENSAGEM BA TEMPU BAILORON

 

Bailoron hanesan periode ne’ebe ho sinal hanesan udan ben remata, rai manas no maran, nebe hamosu potensialidade ba insendiu ailaran no toos no mos ameasadu ba fornesimentu be, agrikultura no ekosistema ambiente nian.

Bailoron bele sai mos hanesan risku ne’ebe ita presija fo atensaun:

· Insendiu no sunu rai: kondisaun rai maran liu bele hafasil mosu insendiu ba iha ita nia ambiente ailaran sira no mos toos, insendiu sira ne’e bele estraga ita nia ambiente natural, ameasa ema nia moris no fo impaktu ladiak ba ekosistema no bioversidade iha ita nia rain.

·  Krisi Ba bee: ita nia rekursu bee hanesan bee matan, mota no lagoa sira sei menus bee hodi sai ameasadu ba ita nia utilizasaun ba kosumu bee mo’os no ba ita nia atividade agrikultura.

· Krisi ba Aihan: Ita nia atividade agrikultura sei menus produsaun bainhira menus bee hodi hamosu krisi aihan no afeta tebes ba ekonomia familia nian.

·  Saúde: Rai rahun no polusaun husi insendiu bele sai ameasa mos ba ema nia saude hanesan respiratoriu.

Asaun Nebe ita presija halo mak hanesan;

· Hamos nafatin ita nia area: kontrolu no hamos ita nia area sira hanesan lixu, duut maran ka material sira ne’ebe fasil ahihan.

· Poupa Bee: Poupa bee barak liu hanesan taka bee bainhira lautiliza ona hodi bele suficente nafatin iha tempu bailoron.

·  Agrikultura: agrikultor sira bele utiliza mulsa ka aitahan maran sira iha aihoris nia hun no irigasuan turu hodi bele efesiensia ba utilizasaun bee atu aihoris sira bele kontinua moris iha tempu bailoron. Prepara no rai mos aihan balun ba tempu bailoron.

· Monitoriza informasaun iklima: kontinua akompanha infomasaun iha media sira kona ba mundansa iklima no alerta, hodi antisipa kondisaun risku sira iha ita nia area.

Tempu Bailoron hanesan obstaklu ida ne’ebe presija iha asaun prevensaun sira hanesan kontrola no hamos ita nia ambiente, kuidadu no labele sunu rai, fo atensaun hodi poupa utilizasaun  bee, agrikultor sira bele kontrola nia toos hodi utiliza mulsa no irigasaun turu ba aihan sira ne’ebe ita kuda no mos rai mos aihan balun ba iha tempu bailoron.